地圖解：真係「梗有一間喺左近」?

NOTE: This blog is originally posted on my Medium. The UI and reading experiences of Medium will sure be better than here. I just want to keep a copy of the blog in my own territory.

前言：究竟點先叫「左近」?

幾年前（準確啲講係差唔多三年前） 寫咗篇文研究吓邊度有多啲 7-11，邊度有多啲 Circle-K。當時提及過「梗有一間喺左近」呢句好多年前 7-11 嘅廣告標語。

之不過，呢句口號有幾準確？行勻哂全香港各個角落，係咪真係每個地方都可以「梗有一間喺左近」?

咁當然唔係啦。唔好講到喺分流附近搵唔到七仔咁極端，就算喺市區，都會有啲地方係「七仔黑洞」，行極都搵唔到 7-11，仲要偏偏係你想搵間七仔買野嗰陣，先會發現自己身處呢啲七仔黑洞。

咁，有邊啲地方係「七仔黑洞」，唔係「梗有一間喺左近」呢?

要答到呢個問題，我地首先要回答一條更基本嘅問題：

究竟點先叫「左近」?

你問我，我會話行五分鐘已經係左近嘅極限。一分鐘內行到，叫行兩步路就到；兩至三分鐘內行到，叫行一陣就到；四至五分鐘先行到，已經叫係有一段距離，同「左近」呢個形容詞無乜關係。

要行超過五分鐘先去到嘅便利店，你都唔會覺得佢真係便利。要行成十分鐘先去到嘅 seven 仔，你買完包冰返去，包冰都溶咗一大半啦。

定義到「左近」之後，我地就可以將條問題改寫成一條可以分析嘅問題：

香港有咩地方係 5 分鐘步行距離範圍入面會搵到/搵唔到 7-11？

但五分鐘即係幾遠？方便起見，呢度再將條題目改一改，變做可以更加容易用地理信息系統（GIS）分析嘅問題：

香港有咩地方係 150 米直線距離範圍入面有間 7-11？

（想知點解用 150 米可以拉到本文最尾睇技術附註）

地圖

下面每張地圖都顯示咗唔同地區每間七仔嘅 150 米直線距離嘅範圍（即係 GIS 嘅 buffer ），圓圈入面嘅地方，代表嗰度 150 米直線距離入面有一間 7-11（呢篇文黎講即係五分鐘路程入面可以搵到一間 7-11）。

免責聲明：

同上篇文一樣，堆空間數據係無完全驗證過。某啲 7-11 位置有錯嘅話，應該唔係你睇錯地方記錯地點，好大機會只係我懶。（搵到嘅話可以同我講返，我會再執執堆數據）

中環

上一篇文講咗中環成堆 7-11，咁當然要睇一睇呢個街頭街尾都係 7-11 嘅地方。基本上全個中環市中心都俾堆圓圈覆蓋。尤其係中環至半山自動扶手電梯兩邊，由 IFC 沿路上去干德道都係可以行兩步路就搵到間七仔。

旺角

另一個 7-11 聚集嘅地點就係旺角。基本上彌敦道都係「梗有一間喺左近」，唔會搵唔到 7-11。而五分鐘步行距離亦都覆蓋埋附近幾條內街，包括西面嘅新填地街、上海街同砵蘭街，以及東面嘅西洋菜南街、通菜街同花園街）。

油尖旺地區內街人流本身都唔少，自然有足夠客源去喺內街開多間七仔。之不過，過咗幾年，我到而家都仲係覺得「豉油街同花園街交界」呢個街口同時有兩間 7–11 呢樣野好神奇。

觀塘

觀塘嘅 7-11 主要集中喺市中心（APM 以及裕民坊一帶）以及開源道。喺駿業街兩頭嘅寫字樓返工都係落樓就搵到一間七仔。

觀塘海濱花園嗰邊反而係七仔黑洞，偉業街範圍入面一間 7-11 都無。想搵間 7-11，一係要向茶果嶺方向行去到宏利金融中心，一係要向牛頭角方向行到去 One Bay East 先有，仲未計海濱道啲行人路過處要等唔知幾耐先綠燈。如果想去海濱花園野餐，記得要喺市中心買定野。

荃灣

一個幾意外嘅發現係荃新天地係一間便利店都無（包括埋 OK），令到大河道/荃灣大會堂嗰一邊嘅荃新天地係可以歸類為「七仔黑洞」。要去最近嘅 7-11，就要行去如心廣場一期或者荃新天地二期，唔信可以上去 荃新天地官網睇一睇。

另外一個幾特別嘅發現，係海濱花園入面有成三間七仔（仲未計有 Circle-K）。成個屋苑真係養得起咁多間便利店？希望有住海濱花園嘅讀者可以解答吓我呢個疑問。

將軍澳

作為 TOD 社區嘅極致，將軍澳堆 7-11 都係開喺堆地鐵上蓋商場。換個角度咁講，就係你落樓就有一間七仔。但同一時間，TOD 嘅極致就係代表你離開咗車站上蓋就會進入七仔黑洞。將南嗰頭無七仔都係令我幾意外。

九龍塘

七仔黑洞唔一定係壞事，有時候，某個地區甚至應該係七仔黑洞——九龍塘就係其中一例。除咗又一城有一堆七仔之外，成區其他地方基本上都係唔會搵到。

你住得九龍塘，應該間屋本身有齊哂日常用品，唔會無啦啦要去七仔。就算真係要去買野，都應該係搵個家傭幫你去便利店買野，而唔會自己行出門口買啦。

城市規劃小補充

九龍塘住宅地區嘅土地用途都屬於 Residential (Group C) ，而便利店屬於「Shop and Services」用途，所以係便利店用途喺 R(C) zoning 入面係 column 2 use 黎。

假如你人夠傻錢夠多，想買間洋房再改裝做 7-11，係要入 s.16 規劃申請的。我都想睇吓城規會會唔會接納咁嘅申請，同埋會收到幾多鄰居嘅意見。

咁篇文到底想講咩？

其實真係無乜。

呢篇文本身都只係為咗更新返三年前嗰套便利店位置數據而 spin-off 出黎嘅 side project，抱住一雞幾味嘅心態，希望更新完數據之後有多啲野寫吓，同時練吓功、出吓地圖。

真係要講嘅話，我會話希望呢篇文俾到個引子大家去留意吓自己住緊嘅社區有無地方係好多或者好少七仔。便利店嘅可達度，某程度上都反映咗嗰區好唔好住，好唔好行。

「location, location, location」呢句陳腔濫調，喺網購時代對零售業仲係咪適用，的確係有商榷餘地。之不過，便利店嘅本質，就係俾你人有三急有野要即刻買黎嗰陣去（唔好同我講你諗住網購包冰叫去救人）。一間便利店嘅位置便唔便利，始終都係佢有無生意嘅重要因素。

最後，俾多張我望到嗰吓笑咗出聲嘅地區…

技術附註：點解係 150 米直線距離?

成年人正常步速大約為每小時四公里（大約等於五分鐘行到 300 米），但考慮到上落樓梯以及斜路、過馬路等種種因素會影響步速，實際步速係應該低過每小時四公里的。

同時，除非你識穿牆，實際步行距離永遠都係大過直線距離， Manhattan distance 距離差唔多係直線距離 1.4 倍。現實城市入面，甚至要兜一大圈行一段路先能夠到達目的地。

與此同時，原地等待嘅時間都係時間。你唔會係無時無刻都行緊，等𨋢搭𨋢等過馬路呢啲唔係步行緊嘅時間，都應該計算入「五分鐘步行距離」入面。

種種因素加埋，將 300 米打個五折，就得出 150 米呢個數字。150 米直線距離圓圈，係一個相對合理嘅 approximation，估算到每個地點 5 分鐘步行距離能夠到達嘅地方。

當然，真係要好嚴謹咁樣驗證嘅話，可以做 sensitivity analysis，試哂用唔同距離得出嘅結果。但呢篇係 blog，唔係學術論文（重要），我寫黎又無錢收（好好好好好重要），就無謂搞咁多了。